TIRANË, 5 shkurt/ATSH/- Kryetari i Bashkisë së Tiranës, Erion Veliaj përgëzoi sot atleten Luiza Gega, e cila arriti një tjetër sukses me rekordin e saj më të fundit në “Meeting de Miramas”, në Francë.
Veliaj nënvizon faktin se një pjesë e kësaj arritjeje për Shqipërinë, i dedikohet edhe Federatës së Atletikës që mbështet talentet.
“Ja rezultati kur sporti hapet, kur ka votime të ndershme, kur federata, si ajo e atletikës, mbështet sportistët e jo Presidentin, e kur ka transparencë e fondet shkojnë tek talentet. Bravo Luiza Gega, goca jonë e KS TIRANA që na bën krenar,” shprehet Veliaj.
Luiza Gega shënoi rekordin e ri, 8:50.08 në garën e 3000 metrave në salla të mbyllura, në Miramas.
Paraqitja e atletes së Tiranës u shpall edhe si “best performance” e të gjithë eventit, pasi krijoi një shkëputje të madhe nga rivalet në një turne ku merrnin pjesë sportistë elitarë dhe medalistë olimpikë.
