TIRANË, 11 dhjetor/ATSH/- Territori i Qarkut të Kukësit është përfshirë nga reshje bore duke sjell vështirësi në disa akse rrugore për drejtuesit e automjeteve.
Policia e Kukësit bën të ditur se në disa akse rrugore është i domosdoshëm përdorimi i zinxhirëve dhe gomave dimërore.
“Në aksin rrugor Kukës –Arrën është i bllokuar nga bora. Aksi Bicaj- Bushtricë-Peshkopi, Kukës –Shëmri, Kukës- Qaf Tobli, Krumë, Bajram-Curri -Valbonë dhe Bajram-Curri -Lekbibaj janë të kalueshëm vetëm me pajisje dimërore. Të gjitha akset e tjera rrugore janë të kalueshme”, bën të ditur policia.
Shërbimet e Policisë Rrugore të Kukësit pavarësisht temperaturave atmosferike të ulëta, ndodhen në shërbim në të gjitha akset rrugore kryesore, për të drejtuar qarkullimin rrugor, me qëllim parandalimin e çdo aksidenti sado i vogël të jetë ai, si dhe për t’i ardhur në ndihmë çdo drejtuesi mjeti që mund të ketë probleme.
Policia e Kukësit ju bën thirrje të gjithë përdoruesve të rrugës të tregojnë kujdes, të përdorin pajisjet dimërore për automjetet, si dhe të respektojnë sinjalistikën.
