TIRANË, 18 korrik/ATSH/ Punimet për ndërtimin e rrugës Qafë Thorë- Theth, 16 km e gjatë, që lidh një ndër zonat më të bukura të Alpeve me Bogën dhe Shkodrën po vijojnë me ritme të larta.
Kryeministri Edi Rama publikoi sot foto nga kantieri i ndërtimit të kësaj rruge.
“Mirëmëngjes, e pa ndalur puna për akset që të çojnë në destinacione turistike nga veriu në jug. Ky segment të çon në alpet e Shqipërisë. Rruga Qafë Thorë – Theth pritet të rrisë aksesin dhe sigurinë për turistët që i afrohen luginës së Thethit”, u shpreh kryeministri.
Projekti për këtë rrugë është pjesë e investimeve që rrjedhin nga plani sektorial i turizmit për rajonin e Alpeve Shqiptare, që bashkë me strategjinë e marketingut turistik dhe programin e investimeve për infrastrukturën vendore përbëjnë atë që njihet si Masterplani i Alpeve.
Projekti parashikon gjerësi asfalti 4 – 4,75 metra dhe në 3 pikat më të rrezikshme të rrugës po ndërtohen 3 tunele nga 20 -30 metra për të siguruar mbrojtje nga ortekët.
Përveç lehtësimit të qarkullimit edhe gjatë stinës së dimrit kur fshati bllokohet nga dëbora, rruga do të ofrojë siguri më të lartë. /a.a/
