TIRANË, 1 korrik/ATSH/ Këshilli i Ministrave miratoi këtë të mërkurë përdorimin e fondit të Rindërtimit për financimin e rikonstruksionit të banesave individuale dhe pallateve në bashkitë Mirditë, Vorë dhe Rrogozhinë.
Në vendim thuhet se vihet në dispozicion për përdorim fondi i rindërtimit në vlerën e 316 970 000 lekësh, për financimin e rikonstruksionit të banesave individuale dhe të pallateve për ata individë të cilët përfitojnë nga grantet e rikonstruksionit, banesat e të cilëve janë klasifikuar si objekte të dëmtuara rëndë apo të dëmtuara lehtë, si pasojë e fatkeqësisë natyrore, dhe që nuk duhen rindërtuar nga e para, në këto tre bashki.
Nga ky fond, bashkisë Mirditë i transferohen 29 820 000 lekësh, bashkisë Vorë 176 250 000 lekësh si dhe bashkisë Rrogozhinë fondi prej 110 900 000 lekësh.
Për zbatimin e këtij vendimi ngarkohen ministri i Shtetit për Rindërtimin, Ministria e Financave dhe Ekonomisë dhe bashkitë Mirditë, Vorë dhe Rrogozhinë. Ky vendim hyn në fuqi menjëherë dhe botohet në “Fletoren Zyrtare”. z.tosku/j.p/r.e/
