Zingraf: ILD, hap tjetër i rëndësishëm i Reformës në Drejtësi

TIRANË, 28 shkurt /ATSH/ – Inspektori i Lartë i Drejtësisë është një hap tjetër i rëndësishëm i Reformës në Drejtësi.

Ambasadori i Gjermanisë në Shqipëri, Peter Zingraf u takua dje në një vizitë të parë me Inspektorin e Lartë të Drejtësisë, të zgjedhur para pak kohësh nga Parlamenti.

“Unë e falënderoj Artur Metanin për bisedën interesante dhe e përgëzoj atë për detyrën e tij të re të rëndësishme dhe me shumë përgjegjësi. Me emërimin e tij u vendos një tjetër komponent i rëndësishëm në zbatimin e reformës në drejtësi në Shqipëri”, tha Zingraf.

“Inspektori i Lartë i Drejtësisë do të kontribuojë me punën e tij në integritetin, profesionalitetin dhe pavarësinë e gjyqësorit shqiptar”, u shpreh ai.

“Një sistem disiplinimi dhe inspektimi funksional dhe i pavarur, që shoqëron procesin e Vetingut – edhe më pas – do të jetë një element vendimtar për të siguruar në mënyrë afatgjatë besimin e popullsisë në një sistem drejtësie me integritet”, theksoi ambasadori Zingraf.

/gj.mima/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.