Presidenti shpall listën e aplikantëve për vakancën në Gjykatën Kushtetuese

TIRANË, 22 tetor /ATSH/ Presidenti i Republikës ka shpallur listen e aplikantëve për plotësimin e “Vakancës së parakohshme” në Gjykatën Kushtetuese.

Institucioni i Presidentit të Republikës, bën me dije se Presidenti i Republikës Ilir Meta, pasi u njoh me njoftimin e Këshillit të Emërimeve në Drejtësi dhe Vendimin e KED-së konstatoi se, Këshilli i Emërimeve në Drejtësi në përfundim të procedurave të verifikimit të kandidaturave të paraqitura për plotësimin e vendit vakant gjyqtar në Gjykatën Kushtetuese “Vakancë e parakohshme”, e krijuar nga përfundimi përpara kohe i mandatit, të ish-gjyqtarit zotit Besnik Imeraj e shpallur për aplikim nga Presidenti i Republikës, ka evidentuar se nga 15 (pesëmbëdhjetë) kandidatë që kishin shprehur interesin për konkurim, ngelën në garë vetëm 2 (dy) kandidatë të lejuar për kandidim.

Ndodhur në këto kushte, pasi vlerësoi informacionin dhe njoftimin e përcjellë nga Këshilli i Emërimeve në Drejtësi, Presidenti i Republikës miratoi menjëherë rishpalljen e procedurës së aplikimit për plotësimin e vendit vakant gjyqtar në Gjykatën Kushtetuese të Republikës së Shqipërisë me qëllim plotësimin e “Vakancës së parakohshme”, të krijuar për shkak të përfundimit përpara kohe të mandatit të ish-gjyqtarit, Besnik Imeraj.

Pas përfundimit të afatit të rishpalljes për aplikim për këtë vend vakant, rezulton se për këtë vakancë kanë aplikuar dhe kanë shprehur interesin shtetasit

  1. Zoti Dedë Kasneci
  2. Zoti Envi Hicka
  3. Zoti Prelë Martini
  4. Zoti Shaqir Hasanaj
  5. Zoti Vasil Bendo
  6. Zonja Vjosa Bodo Mujo

Lista e aplikantëve të mësipërm, së bashku me dokumentacionin e dorëzuar prej tyre do t’i përcillet menjëherë Këshillit të Emërimeve në Drejtësi me qëllim që ky organ të revokojë/shfuqizojë vendimin e pezullimit të procedurës së verifikimit, si dhe vijimin e procesit për verifikimin dhe vlerësimin e të gjitha kandidaturave për plotësimin e këtij vendi vakant, sipas ligjit.

/gj.mima/ /a.g/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.