TIRANË, 17 Korrik /ATSH/ -Skuadra e Kukësit beson tek kualifikimi në raundin tjetër të Ligës së Kampioneve, pas barazimit 0-0 në “Loro Boriçi” të Shkodrës javën e shkuar ndaj maltezëve të La Valletta-s
Kukësi do të udhëtojë në Maltë, ku do të luajë mbrëmjen e sotme ndeshjen e dytë të përballjes me vendasit e La Valletta-s.
Skuadra shqiptare kaloi një javë aspak të qetë, pasi barazimi i Shkodrës u pasua me tension dhe shkarkimin e trajnerin austriak, Peter Pacult, pas përplasjeve me presidentin Gjici.
Gjithsesi në krye të skuadrës ka ardhur tekniku Armando Cungu, i cili e ka drejtuar edhe më parë Kukësin dhe ka hyrë në histori, si skuadra e parë shqiptare që kalonte tre ture, në verën e 2013-ës.
Shkodrani nisi menjëherë nga puna, duke shprehur besimin te grupi i lojtarëve që klubi disponon aktualisht dhe duke theksuar se objektivi primar është kalimi i turit.
Ndonëse nuk dihet ende se ku do të ndërhyjë tekniku shkodran dhe çfarë do të ndryshojë, e sigurt është që Kukësi duhet të luajë një tjetër ndeshje në Maltë, për të vijuar më tej aventurën europiane.
Cungu do të ketë të gjithë lojtarët në dispozicion, ndërsa në konferencën për shtyp të pasdites së sotme, theksoi edhe njëherë besimin që ka te kualifikimi.
Sfida mes La Vallettas dhe Kukësit do të luhet në orën 18:00, në Centenary Stadium (Ta’ Qali), prej ku verilindorët e Cungut do të kërkojnë një rezultat pozitiv për t’u kualifikuar.
Kukësi ka në favor fitoren dhe çdo barazim me gola, për t’u kualifikuar.
/gj.m/ /a.g/
