TIRANË, 4 qershor/ATSH/ – Federata Shqiptare e Rafting së bashku me Universitetin e Sporteve të Tiranës nënshkruan për herë të parë Marrëveshjen për Trajnimin dhe Certifikimin e studentëve dhe sportistëve në fushën e rafting, kajaking dhe sporteve të ujërave të rrëmbyeshme.
Çfarë do të mundësojë kjo marrëveshje?
Për çdo vit akademik do të trajnohen me qëllim punësimi dhe vetëpunësimi rreth 30 të rinj e të reja, të cilët duan të bashkojnë njohuritë dhe aftësitë e tyre fizike me pasionin për natyrën dhe turizmin.
Gjithashtu, përmes kësaj marrëveshje, do të vendosen standardet e sigurisë dhe profesionalizmit të guidave, të cilat do të ushtrojnë aktivitetin e rafting dhe sporteve të tjera të aventurës.
Marrëveshja midis dy institucioneve hyn në fuqi gjatë muajit qershor 2018 dhe është me afat të papërcaktuar.
Gjithashtu, në mjediset e Universitetit të Sporteve të Tiranës u organizua takimi informues me studentët dhe stafin e praktikës profesionale të Fakultetit të Veprimtarisë Fizike dhe Rekreacionit në lidhje me trajnimet dhe praktikat mësimore: Jepi turizmit dhe natyrës! Lundro, puno dhe argëtohu. /z.tosku//r.e/
