PRISHTINË, 4 Prill/ATSH/.- Ministri i Drejtësisë, Abelard Tahiri dhe Ministrja e Integrimeve Europiane, Dhurata Hoxha, kanë takuar sot ambasadorët e vendeve të Bashkimit Evropian, me të cilët kanë diskutuar lidhur me proceset e Kosovës drejt integrimit evropian.
Pas miratimit nga Kuvendi i Republikës së Kosovës të demarkacionit, ministrat Tahiri dhe Hoxha kanë konfirmuar se qeveria do të vazhdoj me përkushtim për të plotësuar edhe kushtin e fundit, atë të luftës kundër korrupsionit.
Ministri Tahiri pasi ka njoftuar ambasadorët me hapat e ndërmarrë nga Ministria e Drejtësisë për të përmbushur legjislacionin e kërkuar nga Agjenda e Reformave Europiane, theksoi se institucionet e drejtësisë janë të mobilizuara më shumë se kurrë.
“Natyrisht, lufta kundër korrupsionit dhe krimit të organizuar është një sfidë dhe proces i përhershëm, që do vazhdojë edhe pas liberalizimit të vizave, megjithatë, në përmbushje të këtij kriteri, mund të konfirmoj para jush se institucionet e sistemit të drejtësisë, janë më të mobilizuara se kurrë më parë”, nënvizoi Tahiri.
Edhe ministrja e Integrimeve Europiane, Dhurata Hoxha, shprehu përkushtimin e qeverisë për të luftuar korrupsionin dhe krimin e organizuar.
“Jemi të vetëdijshëm se progresi i bërë në luftën kundër korrupsionit dhe krimit të organizuar është prioritet i lartë dhe i lidhur ngushtë me procesin e integrimit europian, jo vetëm për Kosovën por edhe për gjithë Ballkanin Perëndimor, ashtu siç është theksuar edhe nga Strategjinë e Ballkanit Perëndimor”, nënvizoi Hoxha.
Ajo siguroi se institucionet shtetërore e kanë të qartë rëndësinë e luftës kundër krimit të organizuar dhe korrupsionit jo si një kriter i lidhur me axhendën e BE-së, por më e rëndësishme, si një kriter i lidhur me përmirësimin e jetës së përditshme të qytetarëve tanë.
“Për këtë gjë, do të mbesim të pamëshirshëm në përpjekjet tona për të luftuar këto dukuri negative”, shtoi ministrja Hoxha./KosovaPress/k.s/
