MOSKË, 20 mars /ATSH-AFP/ – Presidenti amerikan, Donald Trump zhvilloi sot një bisedë telefonike me Vladimir Putin, për ta uruar për rizgjedhjen si president dhe gjatë të cilës ata biseduan për një takim të mundshëm të nivelit të lartë, por jo për helmimin e Sergei Skripal, njoftoi Kremlini.
Presidenti rus, Vladimir Putin, me pozita më të forta përballë perëndimorëve nga rizgjedhja e tij, mori sot urime nga Donald Trump, me të cilin ai diskutoi për një takim të mundshëm në të ardhmen, në përpjekje të uljes së tensioneve, të pazakonta që prej Luftës së Ftohtë.
Në sfondin e helmimit të Sergei Skripal, që ka rikthyer klimën e përballjes Lindje-Perëndim të këtyre viteve e fundit, perëndimorët kanë reaguar menjëherë duke uruar presidentin rus, i rizgjedhur me 76,7% të votave për një mandat të katërt.
“E kam përshëndetur për fitoren në zgjedhjet presidenciale”, tregon Trump nga Zyra Ovale.
“Ne do të takohemi, me shumë gjasa, shumë shpejt”, shtoi ai duke përmendur, mes çështjeve që do të diskutohen, garën e armatimeve, Ukrainën, Sirinë apo dhe Korenë e Veriut./ /ec/
