TIRANË, 5 Mars/ATSH-Z.Tosku/ – Në ambjentet e Shtëpisë së Bardhë, kryeministrit të Shqipërisë, Edi Rama i është dorëzuar sot Çmimi për Pluralizmin Kulturor, nga i emëruari i Presidentit Trump në krye të Komisionit për Mbrojtjen e Trashëgimisë Amerikane në Botë, Paul Packer.
Kjo është bërë e ditur nga vetë Rama përmes një statusi në rrjetin social “Facebook”, të shoqëruar edhe nga një video ku jepen pamje nga ceremonia e marrjes së çmimit.
“Një surprizë e posaçme ceremonia e marrjes sot, në Shtëpinë e Bardhë, të ÇMIMIT PER PLURALIZMIN KULTUROR, dorëzuar nga i emëruari Presidentit Trump në krye të Komisionit për Mbrojtjen e Trashëgimisë Amerikane në Botë, Paul Packer”, shkruan Rama.
Më tej, ai vë në dukje se ky çmim jepet për angazhimin në ruajtjen e kujtesës së Holokaustit dhe mbrojtjes të së vërtetës historike, që vetë Rama e konsideron një nder të veçantë për Shqipërinë. Sipas Ramës, Shqipëria rrezaton me shembullin e saj mbrojtës të popullit hebre gjatë Luftës së Dytë Botërore.
“Çmimi për angazhimin në ruajtjen e kujtesës së Holokaustit dhe mbrojtjen e të së vërtetës historike, një nder shumë i veçantë për mua, qeverinë tonë dhe padiskutim Shqipërinë që rrezaton gjithnjë e kudo me shembullin e saj të mbrojtjes së popullit hebre gjatë orëve të zeza të Luftës së Dytë Botërore”, ka përfunduar Rama. /r.e/
