LISBONË, 28 janar /ATSH-AFP/ – Portugalia, e goditur nga një shpërthim i rasteve me koronavirus, do të kufizojë lëvizjet jashtë vendit për shtetasit e saj për një periudhë 15 ditore, duke nisur nga e diela, njoftoi sot ministri i Brendshëm Eduardo Cabrita.
“Përveç rasteve të jashtëzakonshme, gjatë 15 ditëshit të ardhshëm, daljet e qytetarëve kombëtarë në rrugë ajrore, tokësore apo detare do të jenë të kufizuara”, deklaroi ai gjatë një ndërhyrjeje në Parlament për çështjen e rinovimit të gjendjes së jashtëzakonshme duke nisur nga e diela.
Kjo masë e re kufizuese do të hyjë në fuqi në mesnatën e të shtunës.
Portugalia, vendi më i prekur në botë, në raport me popullsinë gjatë dy javëve të fundit, kishte pezulluar tashmë linjat ajrore me Britaninë e Madhe.
Më pas, Lisbona njoftoi pezullimin duke nisur nga e premtja të të githa fluturimeve me Brazilin. .
Komisioni Europian, i shqetësuar për të shmangur mbylljet e kufijve brenda BE-së, rekomandoi të hënën që vendet anëtare të vendosin kufizime të reja të udhëtimit për zonat më të prekura nga virusi, përfshirë për disa udhëtime thelbësore./ /ec/
