BRUKSEL, 1 janar /ATSH-DPA/- Bashkimi Evropian dhe Japonia hynë sot në një epokë të re bashkëpunimi, pasi një marrëveshje e partneritetit strategjik hyri në fuqi.
“Kjo marrëveshje historike do të drejtojë angazhimin e ardhshëm dhe do të sigurojë bashkëpunim më të ngushtë politik dhe ekonomik për një sërë çështjesh dypalëshe, rajonale dhe shumëpalëshe”, tha Këshilli në një deklaratë të botuar në ditën e Vitit të Ri.
Këshilli i Bashkimit Evropian, është një nga organet kryesore vendimmarrëse të BE-së.
Në veçanti, partneriteti synon të intensifikojë bashkëpunimin në luftën kundër terrorizmit dhe krimeve të rënda ndërkombëtare, si dhe në luftën kundër përhapjes së armëve të shkatërrimit në masë.
Marrëveshja – e cila u arrit në 2018 – parashikon gjithashtu lidhje më të ngushta në fusha të tilla si hapësira, energjia, transporti, arsimi dhe kërkimi.
“Falë partneritetit të ri, BE-ja dhe Japonia do të jenë në pozitë më të mirë për të forcuar rendin global shumëpalësh dhe të bazuar në rregulla duke pasur OKB-në në thelbin e saj dhe për të mbrojtur vlerat dhe parimet e përbashkëta”, thuhet në deklaratë.
Këto përfshinin ligjin e së drejtës, demokracinë, respektimin e të drejtave të njeriut, tregjet e hapura dhe tregtinë e lirë dhe të ndershme. //a.i/
