ROMË, 20 tetor /ATSH-ANSA/ – Numri i kalimeve të parregullta të kufirit drejt Bashkimit Evropian vazhdoi të ulej gjatë nëntë muajve të parë të vitit 2026, ku rastet e evidentuara ranë me pothuajse një të tretën krahasuar me të njëjtën periudhë të vitit të kaluar.
Rruga e Mesdheut Qendror shënoi rënien më të ndjeshme, me një ulje prej 56% të rasteve të evidentuara krahasuar me të njëjtën periudhë të një viti më parë, sipas Frontex, agjencia evropiane për ruajtjen e kufijve dhe bregdetit.
Të dhënat paraprake tregojnë se janë regjistruar pak më shumë se 91,000 kalime.
Vetëm në muajin shtator u evidentuan rreth 14 300 kalime – një shifër 28% më e ulët se në shtatorin e vitit 2025, por 11% më e lartë se në gusht, për shkak të kushteve më të favorshme përgjatë korridoreve kryesore detare.
Kjo periudhë përkoi gjithashtu me verën e parë të plotë nën zbatimin e Paktit të BE-së për Migracionin dhe Azilin, i cili vendos një procedurë të unifikuar dhe të standardizuar verifikimi në kufijtë e jashtëm të Bashkimit.
Rruga e Mesdheut Perëndimor ishte e vetmja rrugë kryesore që shënoi rritje, me një shtim prej 26% të rasteve të evidentuara.
Ndërsa numri i përgjithshëm i mbërritjeve të parregullta vazhdon të ulet, kostoja njerëzore mbetet e lartë.
Sipas Organizatës Ndërkombëtare për Migracionin, pothuajse 2 000 njerëz kanë humbur jetën në Mesdhe që nga fillimi i vitit. /os/
