TIRANË, 30 dhjetor/ATSH-Maela Marini/ Platforma “Transparent Albania” do të ofrojë në kohë reale të dhëna konkrete mbi shpenzimet dhe kontratat e lidhura nga çdo ministri.
Kështu u shpreh sot kryeministri Edi Rama gjatë konferencës së fundvitit me gazetarët.
I pyetur në lidhje me transparencën me publikun dhe median, Rama u ndal tek platforma e re ‘Transparent Albania’.
“Kjo platformë ka filluar të popullohet me të dhëna. Besoj shumë se deri nga mesi i vitit të ardhshëm do jetë një platformë që ju dhe kushdo qoftë do të mund të mësojë në kohë reale çdo gjë që ndodh në Republikën e Shqipërisë, çdo para që shpenzon, çdo kontratë, vendim. Jo thjesht qeveria por edhe ministritë e të gjitha do të jenë aty. Do të kemi edhe një rubrikë të veçantë për të bërë transparencën tonë lidhur me shumë gjysmë të vërteta që publikohen në platformat tuaja, pasi gënjeshtrat më të mëdha janë gjysmë të vërtetat”, tha Rama. /j.p/
