UASHINGTON, 20 dhjetor /ATSH-DPA/- Pas rënies së regjimit të Bashar al-Asaad, në Siri – në fillim të dhjetorit – tre diplomatë të lartë amerikanë thuhet se kanë mbërritur në kryeqytetin, Damask për bisedime mbi të ardhmen e vendit.
“Sipas burime, janë planifikuar takime me liderët e grupit islamik Hayat Tahrir al-Sham (HTS), i cili ka formuar një qeveri kalimtare në Siri – pasi udhëhoqi ofensivën e befasishme rebele që rrëzoi al-Asaad-in”, raportoi “The New York Times”.
Kjo është vizita e parë e diplomatëve amerikanë që nga rrëzimi i al-Asaad, i cili është arratisur në Moskë.
Delegacioni amerikan kërkon të vlerësojë situatën në Siri dhe të ndihmojë në formësimin e saj.
Tre diplomatët janë, Kryediplomatja në Departamentin e Shtetit përgjegjës për Lindjen e Mesme, Barbara Leaf; i dërguari special i SHBA për pengjet, Roger Carstens; dhe i dërguari special për Sirinë, Daniel Rubinstein.
Shtetet e Bashkuara të Amerikës theksuan më herët se trajtimi i drejtë i pakicave etnike dhe fetare, duke përfshirë të krishterët, duhet të ishte qendror në fazën e tranzicionit në Siri.
Uashingtoni ka qenë në kontakt me HTS më parë, por po lufton se si të veprojë me grupin, të cilin e konsideron një organizatë terroriste.
Megjithatë, kjo nuk i ndalon diplomatët amerikanë të takohen me përfaqësuesit e saj.
“Megjithatë, kjo e bën më të vështirë punën e organizatave të ndihmës humanitare”, sipas NBC.
Gjithashtu thuhet se do të ketë takime me përfaqësues të komuniteteve të ndryshme, të shoqërive civile dhe aktivistë.
Bisedimet do të fokusohen në idetë e tyre për të ardhmen e Sirisë dhe mbështetjen e mundshme nga SHBA-ja.
Diplomatët gjithashtu do të kërkojnë për gjurmët e shtetasve të humbur amerikanë, përfshirë gazetarin Austin Tice, i cili u rrëmbye në Siri në vitin 2012.
Lufta civile shpërtheu në Siri në vitin 2011 pas protestave pro-demokracisë kundër regjimit të al-Asaad. Një vit më pas, SHBA-ja ndërpreu marrëdhëniet diplomatike me vendin. //a.i/
