TIRANË, 12 dhjetor/ATSH/ Në qytetin e Durrësit vijon puna për ndërtimin e parkimit publik.
Ky parkim ndodhet pranë Stacionit të Trenit dhe pritet të lehtësojë ndjeshëm problematikën e drejtuesve të automjeteve.
Kryeministri Edi Rama ndau në rrjetet sociale foto nga punimet që po vijojnë me ritëm të lartë.
“Vijojnë punimet në godinën e parkimit publik pranë stacionit të trenit në Durrës Qendra e re e parkimit do të ketë 400 vende parkimi si dhe funksione të ndërthurura midis hapësirave për parkim, ambienteve për zyra dhe aktiviteteve të hapura social-kulturore”, u shpreh Rama.
E ndodhur midis stacionit të trenit, portit të qytetit, terminalit të autobusëve interurbanë, qendrës së qytetit dhe daljes në drejtim të rrugëve kombëtare, qendra e re e parkimit ka një potencial të veçantë në qytet, për zhvillimin, jo vetëm të zonës përreth, por dhe më gjerë.
Parkingu publik në Durrës do të ketë lidhje edhe me segmentet e hekurudhës dhe portit më të rëndësishëm të vendit.
/a.f/r.e/
