TIRANË/ 15 tetor/ ATSH/ Sot është Dita Ndërkombëtare e Shkopit të Bardhë, dita që simbolizon pavarësinë dhe lirinë e lëvizjes për personat e verbër. Dhe nisur nga kjo ditë e veçantë, një grup prej disa personash që bëjnë pjesë në këtë kategori, kanë organizuar një marshim simbolik në kryeqytet, që nisi nga Teatri Kombëtar i Operas dhe Baletit në drejtim të sheshit “Nënë Tereza”.
Me banderola dhe pankarta në duar, ata kërkojnë vëmendjen e shtetit dhe autoriteteve që t’i ndihmojnë në sfidat e tyre të përditshme. Nga investimi në infrastrukturën e dedikuar për personat me aftësi të kufizuar të shikimit, te sinjalizimet zanore nëpër semaforë apo udhëzues të tjerë në vende publike.
Të pranishmit në këtë marshim bënë thirrje për ndërmarrjen e masave konkrete që u garantojnë atyre një akses gjithëpërfshirës, pavarësisht aftësive. Një prej këtyre pikave kryesore, mbetet infrastruktura që u përmirëson cilësinë e jetës dhe u jep mundësinë të lëvizin në mënyrë të pavarur, për t’u angazhuar më pas në jetën e përditshme dhe aktivitete të ndryshme shoqërore.
/Ermira Isufaj/a.f/r.e/
