TIRANË 6 shtator /ATSH/ Drejtoria Vendore e Policisë Tiranë njoftoi sot bllokimin e disa segmenteve rrugore në Tiranë si pasojë e zhvillimit të një tubimi përpara bashkisë së Tiranës.
“Për shkak të zhvillimit të një tubimi, ditën e sotme, në orën 11:00, përpara Bashkisë Tiranë, do të ketë bllokime të disa segmenteve rrugore, si dhe bllokime të pjesshme të disa segmenteve të tjera në varësi të lëvizjes së tubuesve”, njofton Policia.
Policia bën të ditur se, prej orës 11:00 e deri në përfundim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës.
Policia apelon për të gjithë qytetarët që të shmangin lëvizjen në këto akse rrugore dhe të përdorin rrugë alternative, deri në përfundim të tubimit, si Unaza e Mesme dhe Unaza e Madhe. /j.p/
