BRUKSEL, 31 gusht /ATSH/ – NATO nuk ishte e përfshirë në ofensivën e papritur të Ukrainës në rajonin e Kurskut të Rusisë, deklaroi shefi i NATO-s, Jens Stoltenberg.
“Ukraina nuk ka planifikuar për Kursk me NATO-n dhe aleanca nuk ka pasur asnjë rol”, theksoi ai.
Rreth 10 000 trupa ukrainase kaluan në rajonin perëndimor të Rusisë më 6 gusht. Kievi pretendon se kontrollon rreth 100 vendbanime dhe më shumë se 1000 kilometra katrorë të territorit rus.
Presidenti ukrainas Volodymyr Zelensky tha se ”qëllimi i avancimit në Kursk ishte krijimi i një zone tampon për të ndaluar sulmet e Moskës në rajonin Sumy të goditur rëndë në Ukrainë”.
Moska akuzon shtetet e NATO-s se mbështesin Kievin në pushtimin e tij duke ofruar armë dhe municione për ushtrinë ukrainase, si dhe të dhëna të inteligjencës. /os/
