TIRANË, 24 qershor/ATSH/ Kryetari i Partisë Demokratike, Sali Berisha i ka bërë thirrje të gjithë demokratëve që të mblidhen rreth flamurit të partisë së tyre.
Në mbledhjen e kryesisë që u zhvillua në selinë blu, Berisha theksoi se ky nuk është një bashkim në festë, por një bashkim në betejë.
Berisha i ka bërë thirrje anëtarëve të kryesisë dhe drejtuesve, se PD ka nevojë të bashkohet me të gjithë spektrin opozitar.
“PD ka nevojë të bashkohet jo vetëm me të gjithë mbështetësit e saj, por ka nevojë të bashkohet me të gjithë spektrin opozitar”, theksoi Berisha gjatë fjalës së tij në mbledhjen e kryesisë.
Kryedemokrati Sali Berisha theksoi se detyra e demokratëve është shpëtimi i Shqipërisë nga regjimi i Edi Ramës dhe krijimi i qeverisë teknike.
“Detyra jonë është një dhe vetem një, shpëtimi i Shqipërisë nga ky regjim dhe krijimi i qeverisë teknike”, u shpreh Berisha në mbledhjen e kryesisë.
Në mbledhjen e kësaj të hënë u caktua data e protestës kombëtare, e cila do të mbahet më 12 korrik në orën 20:00.
Në një deklaratë për mediet, pas mbledhjes së kryesisë, Luçiano Boçi tha se në protestë do të kërkohet lirimi i Sali Berishës si dhe krijimi i kushteve për zgjedhje të lira, përmes një qeverie teknike pa Ramën kryeministër.
