TIRANË, 3 prill/ATSH/ Kryeministri Edi Rama ndau mbrëmjen e sotme fotoalbumin e hapjes së Qendrës së re të Inovacionit, Sigurisë dhe Mbrojtjes.
Rama e cilësoi qendrën një faqe të re të modernizimit të Forcave të Armatosura të Shqipërisë, por edhe i qeverisjes, duke shërbyer si mbështetje edhe për sektorin privat.
“Shumë shpejt do të kemi edhe produktet e para inovative nga qendra e re që do të jetë një model frymëzues edhe për të rinjtë”, tha Rama.
Qendra e re e Inovacionit të Sigurisë dhe Mbrojtjes shënoi me hapjen e saj një epokë të re të zhvillimit teknologjik dhe modernizimit në fushat e sigurisë dhe mbrojtjes.
Kjo qendër, e cila u inaugurua sot i bashkëngjitet Njësisë Ushtarake të Sigurisë Kibernetike, një tjetër projekt madhor për mbrojtjen në botën digjitale, me një rol kyç në luftën kundër kërcënimeve kibernetike dhe mbrojtjes së sistemeve tona të informacionit, e ngritur falë mbështetjes së SHBA-ve.
Nëpërmjet Qendrës së re të Inovacionit të Sigurisë dhe Mbrojtjes, synohet ndër të tjera të forcohen kapacitetet kombëtare në fushën e sigurisë dhe mbrojtjes përmes zbatimit të projekteve inovative dhe integrimit të teknologjive të avancuara, si dhe të nxitet zhvillimi i një ekosistemi të inovacionit në siguri dhe mbrojtje.
