TRIPOLI, 12 shtator /ATSH-DPA/ – Një stuhi e fuqishme që përfshiu Libinë lindore mund të ketë shkaktuar vdekjen e mijëra personave dhe dëme masive në shtëpi, diga dhe rrugë, tha sot një zyrtar.
Kryeministri i caktuar dhe ministri i Financave i një prej qeverive rivale në vendin e përfshirë nga lufta civile, Osama Hammad tha se mund të jenë vrarë mbi 2 000 persona.
Ai shtoi se disa qytete ishin shkatërruar tërësisht.
Por, një zyrtar ushtarak në rajonin më të goditur tha se numri i të vdekurve ishte shumë më i lartë dhe paralajmëroi se mijëra të tjerë janë raportuar të zhdukur.
Zëdhënësi i Ushtrisë Kombëtare Libiane (LNA) gjeneral-major Ahmed al-Mismari tha se rreth 2 000 persona kishin vdekur në qytetin lindor të Dernas.
“Ndërsa 5 000- 6 000 persona janë raportuar të zhdukur”, tha ai në një konferencë për shtyp.
“Numri i të vdekurve ka të ngjarë të rritet”, sipas burimeve mjekësore në Derna.
“Dy diga në qytet janë shembur”, tha këshilli në faqen e tij në Facebook. //a.i/
