TIRANE, 1 gusht/ATSH/ Kryetari i Partisë Demokratike, Lulzim Basha u shpreh sot gjatë një takimi në Elbasan se Kuvendi Kombëtar i 2 shtatorit çel siparin e ndryshimeve të rëndësishme për Partinë Demokratike.
Basha tha se në këtë Kuvend, demokratët do të përcaktojnë me votën e tyre aksionin politik dhe ndryshimet e nevojshme për të qenë një parti bashkëkohore, me një kulturë të re politike, pranë qytetarëve, me vizion e program të qartë për problemet konkrete që prekin familjet shqiptare.
“Strukturat drejtuese të qarkut të Elbasanit janë të vendosura për të çuar përpara riorganizimin dhe modernizimin e degëve të Partisë Demokratike, për t’i prirë përballjes me kundërshtarin politikë, për t’iu kundërvënë korrupsionit të pushtetit me vlera dhe alternativën më të mirë”, u shpreh ai në një postim në rrjetet sociale.
“Korrupsioni që ka kapur shtetin, siç dëshmon afera e inceneratorëve, i bën jetike për vendin propozimet tona për pastrimin e politikës përmes vetting-ut, që abuzuesit me pronat, taksat dhe besimin e shqiptarëve të mos gjejnë më vend në politikë”, tha Basha.
/r.e/
