TIRANË, 9 mars /ATSH/ Komisioneri Shtetëror i Zgjedhjeve, Ilirjan Celibashi në seancën e sotme publike shqyrtoi kërkesat e partive politike për regjistrimin si subjekte zgjedhore në zgjedhjet për organet e qeverisjes vendore të datës 14 maj 2023.
Në përfundim të shqyrtimit të kërkesave dhe dokumentacionit shoqërues, Komisioneri Celibashi vendosi pranimin e kërkesës dhe regjistrimin si subjekt zgjedhor të “Partisë Socialiste të Shqipërisë” dhe “Partisë së Lirisë”.
Po ashtu, Komisioneri Shtetëror i Zgjedhjeve vendosi kthimin për plotësimin e dokumentacionit për partinë “Bindja Demokratike” dhe partinë “Lëvizja për Zhvillim Kombëtar” dhe mos regjistrimin si subjekt zgjedhor të partisë “Lëvizja Bashkë”.
Gjithashtu, në seancën e sotme u miratuan vëzhguesit afatgjatë të Komitetit Shqiptar të Helsinkit për vëzhgimin e procesit të zgjedhjeve për organet e qeverisjes vendore.
/r.e/
