TIRANË, 8 shkurt /ATSH/ Drejtoria Rajonale e Trashëgimisë Kulturore Shkodër po vijon punën e përditshme për përmirësimin e sinjalistikës së brendshme në sitet dhe pasuritë kulturore.
Lajmin e bëri të ditur sot në rrjetet sociale ministrja e Kulturës, Elva Margariti, e cila ka publikuar edhe foto nga këto site.
Ministrja u shpreh se, “tashmë janë vendosur tabela shpjeguese/orientuese në kishën e Shën Premtes, Balldren (shek.XIV) dhe kishën e Shën Venerandës, Pllanë (Shek.XIV-XVII)”.
Margariti tha se, informacioni i përditësuar orientues në këto tabela vjen në dy gjuhë (shqip/anglisht) dhe do t’i vijë në ndihmë vizitorëve vendës dhe të huaj, për të mësuar më shumë mbi historinë e objekteve të kultit.
/gj.m/
