TIRANË, 19 janar/ATSH – I. Vata/ Zëvendësministrja e Brendshme, Romina Kuko mori pjesë në takimin rajonal për forcimin e identifikimit dhe mbrojtjes së personave të trafikuar.
Zyra e Kombeve të Bashkuara për Drogën dhe Krimin (UNODC), në bashkëpunim me Zyrën Kombëtare të Koordinimit Antitrafik në Ministrinë e Brendshme të Republikës së Shqipërisë dhe Ministrinë e Evropës dhe Punëve të Jashtme të Francës, zhvilluan më 18-19 Janar Takimin e Grupit Rajonal të Ekspertëve “Forcimi i identifikimit dhe mbrojtjes së personave të trafikuar, veçanërisht për qëllimin e kriminalitetit të detyruar, duke përfshirë kurrikulat e trajnimit në Evropën Juglindore”, REGM.
Po ashtu, Kuko tha se, në takim morën pjesë zbatues të ligjit, të cilët ndanë praktika më të mira në luftë kundër trafikimit të personave.
“Ky takim mblodhi zbatues të ligjit, prokurorë, gjyqtarë, te ngarkuar me hetimin dhe ndjekjen penale të trafikimit të personave dhe krimit të organizuar, organizata kombëtare dhe ndërkombëtare, shoqëri civile si edhe institucione nga Shqipëria, Bosnja dhe Hercegovina, Bullgaria, Kroacia, Greqia, Kosova, Moldavia, Mali i Zi, Maqedonia e Veriut, Rumania, Serbia dhe Sllovenia për të ndarë eksperiencat, sfidat, praktikat e mira”, shkroi Kuko.
