TIRANË, 18 qershor/ATSH/ Autobusi i Këndit Amerikan Lëvizës vizitoi ditën e djeshme qytetin e Beratit.
Ambasada e SHBA në Tiranë falënderoi të gjithë ata që morën pjesë dhe iu bashkuan ekipit të të rinjve për të shijuar lojërat, vizitat përmes realitetit virtual në SHBA dhe një shumëllojshmëri ushqimesh amerikane të përgatitura nga nxënësit e shkollës së mesme profesionale “Kristo Isak”.
“Falënderime të veçanta për Këshillin Rinor të Ambasadës sonë, Ambasadorët e Natyrës dhe ekipet e Education USA për kontributin në një vizitë të shkëlqyer në Berat”, thekson Ambasada e SHBA në një postim në rrjetet sociale.
Anëtarët e Brigadës Këshillimore të Forcave Speciale të SHBA surprizuan pjesëmarrësit me praninë e tyre dhe folën me të gjithë ata që donin të mësonin më shumë rreth përvojës dhe shërbimit të tyre ushtarak.
“Sot autobusi i Këndit Amerikan Lëvizës vazhdon udhëtimin e tij nëpër Shqipëri. Na u bashkoni në qendër të qytetit të Pogradecit nga ora 10:00-14:00 dhe në pedonalen e Korçës nga ora 18:00-20:00”, thekson ambasada e SHBA-së.
/k.s/j.p/
