TIRANË, 22 shkurt/ATSH – I. Vata/ Kryetari i Partisë Demokratike, Lulzim Basha në një intervistë për Radio Vatikani deklaroi se shqiptarët meritojnë dhe presin një ndryshim rrënjësor të kulturës politike në vend. Të kthejmë besimin te politika. E ardhmja lind mes sakrificash.
Mbi takimin me ministrin e Jashtëm të Vatikanit, Imzot Pon Galleger, Basha tha se u fokusuan në çështjet e bashkëpunimit dypalësh.
“Së pari, dua të shpreh kënaqësinë që ndodhem sërish në shtetin e Vatikanit, në selinë e shenjtë, kësaj radhe me ftesë të ministrit të Jashtëm të Vatikanit, Imzot Pol Galleger, me të cilin kemi zhvilluar një bisedë të gjatë dhe shumë të frytshme mbi zhvillimet në Shqipëri, mbi zhvillimet në Ballkan, me theks të veçantë sigurisht Kosovën, dhe mbi marrëdhëniet midis Shqipërisë dhe Selisë së Shenjtë. Jemi fokusuar në çështjet e bashkëpunimit dypalësh, kemi prekur edhe historikun e këtyre marrëdhënieve në veçanti pas rënies së komunizmit, por me kënaqësi mund të them që kemi folur dhe për të ardhmen e marrëdhënieve midis Shqipërisë, shqiptarëve dhe selisë së shenjtë që ka një kuptim të veçantë për çdo shqiptar pavarësisht prej besimit fetar, për rolin që ka luajtur në shembjen e diktaturës dhe në emancipimin e shoqërisë shqiptare dhe për mbështetjen që m’u konfirmua sot nga ministri i Jashtëm i Vatikanit, për rrugëtimin Evropian të Shqipërisë, për anëtarësimin e Shqipërisë në Bashkimin Evropian”, tha ai.
Për marrëdhëniet dypalëshe mes Selisë së Shenjtë dhe Shqipërisë në kontekstin aktual të sfidave aktuale që ka Shqipëria, Basha u shpreh se mbështetja nga Vatikani është shumë e rëndësishme, duhet t’i jemi mirënjohës të gjithë, jo vetëm ne opozita, demokratët, por të gjithë shqiptarët.
“Prania ime si kryetar i opozitës në Selinë e Shenjtë, në ambientet e ministrit të Jashtëm të Vatikanit, është jo vetëm një vlerësim dhe një besim në kursin, në rrugën ku Partia Demokratike, si partin e qendrës së djathtë, si parti e vlerave konservatore, ka zgjedhur por edhe për betejat që po zhvillojmë në emër të shqiptarëve dhe për shqiptarët. Kauza të cilat Selia e Shenjtë i përkrah jo vetëm në Shqipëri dhe në Ballkan, por edhe anembanë botës. Lufta kundër varfërisë, lufta kundër padrejtësisë, lufta për një shtet të barazisë para ligjit, të drejtësisë dhe të trajtimit me një standard para ligjit, pra të ndëshkimit në veçanti të korrupsionit si një armik i mirëqenies së qytetarëve dhe jo mbrojtjes të të pushtetshmëve dhe ndëshkimit të atyre që nuk kanë akses në institucione, nuk kanë akses në drejtësi të të vobektëve dhe kështu me radhë. Pra, kemi një konvergjencë të vlerave që vet Vatikani, Selia e Shenjtë i mbron dhe i promovon kudo në botë. Pra, mbështetja nga Vatikani është shumë e rëndësishme, duhet t’i jemi mirënjohës të gjithë, jo vetëm ne opozita, demokratët, por të gjithë shqiptarët. Nga ana tjetër mund të bëjmë shumë më shumë si Shqipëri për të forcuar këtë marrëdhënie kaq domethënëse për ne. Mos të harrojmë se ishte kjo marrëdhënie dhe në fakt dua ta them sot sepse është mundësia e parë që më jepet. Ishin valët e Radio Vatikanit, një nga armët e vetme, një nga rrezet e vetme të dritës që çante errësirën e diktaturës dhe vazhdojnë të mbeten të rëndësishme për të gjithë shqiptarët që kërkojnë të ecin në rrugën e drejtë, drejt zhvillimit dhe përparimit”, tha ai.
Mbi sfidat që ka shoqëria në Shqipëri, në mënyrë të veçantë politika si drejtuese e shoqërisë në Shqipëri Basha u shpreh se “ajo që shqiptarët meritojnë, presin me padurim, është një ndryshim rrënjësor i kulturës politike në vend. Që nga koha kur valët e Radio Vatikanit ia dolën pas 4-5 dekadash, së bashku me valët e Zërit të Amerikës, të Radio Londrës, të Radios Evropa e Lirë, të ndihmonin shqiptarët, të çanin perden e hekurt, e të hiqnin zgjedhën e diktaturës, çka e kremtuam edhe dje, e përkujtuam edhe dje me rastin e 31-vjetorit të rrëzimit të shtatores së diktatorit në Tiranë, Shqipëria ndodhet përsëri në udhëkryq”.
Po ashtu, Basha duke iu përgjigjur pyetjes pse Shqipëria në udhëkryq, shtoi se “kemi më shumë se 8 vite, që nuk hedhim hapa përpara atij që e kemi shpallur, pavarësisht bindjeve politike apo krahëve politik, të cilëve u përkasim, si një destin dhe qëllim të përbashkët. Integrimin e vendit në Bashkimin Europian. Anëtarësimi i vendit në BE, nuk është një proces firmosje letrash, as një proces burokratik, është një proces arritje që kryhet përmes reformave. Reforma të cilat kanë mbetur në vendnumëro dhe nuk kanë prodhuar rezultatet e duhura. Në veçanti do të theksoja 25 prillin, si një moment shumë problematik, i cili ka asgjësuar përkohësisht mekanizmin e ndryshimit në demokraci, që është vota e lirë dhe përkushtimin e Partisë Demokratike që ditën e parë në parlament ndaj kauzës së rikthimit të legjitimitetit dhe demokracisë të institucioneve shqiptare. Duke nisur me parlamentin shqipëtar e pastaj me gjithë institucionet e tjera. Në kuadrin e, sigurisht zhvillimeve të fundit, hapi i parë që është hedhur me rikrijimin e komisionit për reformën zgjedhore, është një hap që kërkon vëmendje dhe përkushtim nga gjithë aleatët tanë, përfshirë dhe selinë e shenjtë. Por nga ana tjetër jemi përpara hapave të parë të një drejtësie, e cila i është nënshtruar një reforme kushtetuese, që para pothuajse 6 vjet. Sigurisht këtu, në Vatikan, është nga vendet që mund ta shohim gotën gjysmë bosh ose gjysmë plot, dhe kjo vendoset nga perspektiva e gjithësecilit. Nga njëra anë nuk jemi aty ku shqiptarët prisnin, nga ana tjetër siç e dëshmon dhe aktualiteti politikë , afera e incenertorëve, denoncimet tona, qëndrimi ynë besnikë ndaj kauzave tona, lufta pa kompromis kundër korrupsionit, mund të themi se ka filluar të japë shenjat e para të rezultateve”.
Mbi situatën e pandemisë në Shqipëri Basha u shpreh se, “problematikat e pandemisë vetëm kanë nxjerrë në pah dobësinë e institucioneve shqiptarëve. Kanë nxjerrë në pah egoizmin e politikanëve shqiptarë, të pushtetarëve shqiptarë. Sepse në fund të fundit, çfarë po tregon afera e inceneratorëve që po hetohet në këto momente në Tiranë, që dhe në kohën kur njerëzit kishin më shumë nevojë se kurrë për ndihmën e shtetit, taksat që ata i paguanin shtetit, përfundonin në duart e një grushti njerëzish të korruptuarish, pushtetarësh dhe aksesorësh tyre. Ajo që mund të them është se, kemi shumë shumë punë për të bërë. Në raport me luftën kundër korrupsionit”.
Në lidhje me pyetjen se cila është puna që duhet të bëjë opozita apo cilat janë ato mangësi që ndoshta opozita në këto vite nuk i është përgjigjur në mënyrën më të duhur, Basha tha se mendon që kthimi i besimit te politika është sfida më e madhe që kemi.
“Formimi i besimit te politika si instrument ndryshimi, është e keqja më djallëzore që ka ndodhur në veçanti në dekadën e fundit. Politika nuk është e keqe. Të keqe e bëjnë njerëzit. Të mirë po kështu, e kanë në dorë ta bëjnë njerëzit. Ndaj me vendimet qe kemi marrë, janë vendime të marra nga një trupë e madhe politike e demokrateve, për të ecur përpara drejt së ardhmes. Gjithashtu me disa parime bazë. E para, ti rikthejmë politikës fytyrën njerëzore. Një fytyrë njerëzore, nuk do të thotë thjesht një shprehje figurative, nuk do të thotë thjesht një performancë para medieve, por do të thotë të zgjedhim të promovojmë në lidership, njerëzit që me të vërtetë ndjejnë, përfaqësojnë dhe mbrojnë hallet dhe problemet e njerëzve të thjeshtë. E dyta, ti kthejmë institucionet shqiptarëve”, tha ai.
Për sa i përket betejës për zgjedhjet e pjesshme lokale të 6 marsit, Basha u shpreh se “pavarësisht se ndodhi për një kohë shumë të shkurtër dhe kanë shumë pak vëmendje, ajo që kemi vendosur dhe që tregon dhe fillesat e këtij ndryshimi kulturor politik, që do të thotë është një kulture e re politike që po mundohemi ti japim vendit, na takon sepse jemi një brez i dyte pas 31 viteve, pas rënies se shtatores se diktatorit, filloi brezi i ri politik. Na takon te bëhemi pjesë e kësaj kulture të re politike, e kësaj mendësie te re politike. Ne rastin e 6 marsit, kjo ka marre formë, pikërisht mundësinë e demokrateve, e këtyre 6 bashkive, ku ndodhin këto zgjedhje lokale, që të propozojnë dhe sjellin njerëzit që ata mendojnë se i mirëpërfaqësojnë ata, hallet dhe problemet e tyre, dhe më së miri do i japin zë shqetësimeve të tyre, nesër si kryetarë të bashkive. Sigurisht sfida shtrihet tej kësaj, shtrihet tek rikthimi i instrumenteve demokratike”.
/r.e/
