TIRANË, 24 janar /ATSH/ Kryetari i grupit parlamentar të Partisë Socialiste, Taulant Balla priti sot në një takim në Kryesinë e Kuvendit, ambasadorin e Italisë në Tiranë, Fabrizio Bucci.
Gjatë takimit Balla vlerësoi mbështetjen e pakursyer të Italisë në rrugëtimin e Shqipërisë në Bashkimin Evropian, ndërsa theksoi nevojën për të forcuar më tej bashkëpunimin edhe në dimensionin parlamentar.
Sipas Ballës, Italia ka qenë dhe mbetet partneri ynë kryesor, i pari në marrëdhëniet ekonomiko-tregtare dhe vendi që nuk është kursyer asnjëherë në mbështetje të transformimit të Shqipërisë nga një diktaturë, në një demokraci funksionale.
“Prita sot në një takim në Kryesinë e Kuvendit Ambasadorin e Italisë në Tiranë, Fabrizio Bucci. Teksa vlerësova mbështetjen e pakursyer të Italisë në rrugëtimin e Shqipërisë në Bashkimin Evropian, theksova nevojën për të forcuar më tej bashkëpunimin edhe në dimensionin parlamentar”, u shpreh Balla.
“Italia ka qenë dhe mbetet partneri ynë kryesor, i pari në marrëdhëniet ekonomike-tregtare dhe vendi që nuk është kursyer asnjëherë në mbështetje të transformimit të Shqipërisë nga një diktaturë, në një demokraci funksionale”, theksoi Balla.
“Gjatë vitit 2021 eksportet e mallrave nga Shqipëria drejt Italisë u rritën ndjeshëm, duke arritur vlerën e 155.7 miliardë lekë apo rreth 1.2 miliardë euro në vitin 2021, duke u zgjeruar me gati 270 milionë euro”, tha Balla.
/j.p/r.e/
