TIRANË, 30 dhjetor /ATSH/ Medaljet e fituara nga peshëngritësi shqiptar Briken Calja në botërorin e peshëngritjes të mbajtur këtë dhjetor në Uzbekistan, janë konfirmuar sot zyrtarisht, pasi rezultatet antidoping treguan se peshëngritësi shqiptar është i pastër.
Lajmin e ka dhënë vetë peshëngritësi Calja, i cili ka shkruar në rrjetet sociale se, “një lajm i mirë mbërriti këtë mëngjes: Testet antidoping dolën duke treguar pastërtinë dhe vërtetësinë e medaljeve historike të Botërorit të fundit. Jam jashtëzakonisht i lumtur që medaljet e arit dhe të argjendit certifikohen”.
Calja është shpallur kampion bote në stilin e shkëputjes. Në kampionatin Botëror të Peshëngritjes që u zhvillua në Uzbekistan, peshëngritësi kuqezi arriti të fitojë medaljen e artë në kategorinë 73 kg, duke ngritur në provën e tretë peshën 156 kg.
Ndërsa në stilin e shtytjes Briken Calja u shpall nënkampion bote, duke zënë vendin e dytë pasi ngriti 186 kg, 6 më pak se vendi i parë.
Kështu në dygarësh Calja arriti peshën 342 kg, 1 kg më pak se vendi i parë, duke u renditur në vendin e dytë e duke marrë medaljen e argjendtë.
/j.p/
