TIRANË, 30 dhjetor/ATSH/ Mesha e Krishtlindjes për banorët e Rubikut u zhvillua këtë vit në kishën e rehabilituar falë programit “EU4Culture”.
Kryeministri Edi Rama ndau sot pamje nga përurimi i kësaj kishe, një monument françeskan, që ndodhet mbi një kep shkëmbi me pamje nga lumi piktoresk Fan.
“Banorët e Rubikut e festuan sërish Krishtlindjen në kishën e tyre shumëshekullore, e cila iu rikthye plot shkëlqim besimtarëve falë ndërhyrjes së Ministrisë Kulturës përmes programit EU4Culture”, thekson Rama.
Kisha e Manastirit të Rubikut u themelua në vitin 1166, si një nga katër Kuvendet Benediktine në rajonin e Mirditës.
Kisha është veçanërisht domethënëse, pasi forma e saj arkitekturore tregon kontekstin gjeohistorik të Shqipërisë, forma planimetrike e kishës dhe harqet e mbyllura në absidë janë të stilit tipik romanik, por stili i pikturës murale është qartësisht bizantin.
Nëpërmjet mbështetjes së programit “EU4Culture”, arkitektura dhe historia e rëndësishme e kishës dhe afresket e rralla do ta nxisin turizmin kombëtar dhe ndërkombëtar për ta shijuar këtë monument kulture.
/k.s/j.p/
