TIRANË, 7 dhjetor/ATSH/ Çmimet e mallrave të importit shënuan rritje vjetore prej 3.3 % në tremujorin e tretë të vitit 2021, krahasuar me të njëjtën periudhë të vitit 2020, ndërsa krahasuar me tremujorin e dytë të këtij viti shënuan rritje me 1.8 %.
Instituti i Statistikave, (INSTAT) publikoi sot indeksin e çmimeve të importit.
Referuar të dhënave, çmimet e importit të produkteve në grupin “energjia elektrike, gazi, avulli dhe ajri kondicionuar” kanë shënuar rritje vjetore prej 35.1 %. Ndërsa çmimet e importit të mallrave në grupin “industria përpunuese” me peshën më të madhe prej 94 %, shënoi një rritje me 2.1 %.
Brenda këtij seksioni rritja më e madhe e çmimeve vërehet në produktet e aktivitetit të përpunimit të koksit dhe rafinerisë së nënprodukteve të naftës me 5.1 %.
Edhe çmimet e mallravwe të importit për aktivitetet e prodhimit të pijeve shënuan rritje me 4.9 %, ndërsa për aktivitetin e metalurgjisë, 3.4 %.
Nga ana tjetër çmimet në aktivitetin e prodhimit të letrës dhe produkteve prej letre kanë shënuar ulje me 2.1 %.
/j.p/r.e/
