TIRANË, 26 nëntor/ATSH/ Mbledhja e përbashkët mes dy qeverive, të Shqipërisë dhe të Kosovës mbahet këtë të premte në qytetin e Elbasanit.
Sipas agjendës së publikuar nga zyra për shtyp e Kryeministrisë, do të ketë një takim mes dy kryeministrave, si dhe takime të veçanta mes ministrave të dikastereve homologe, ku do të bëhet një vlerësim i zbatueshmërisë së marrëveshjeve të arritura më para. Më pas do të ketë dhe një takim të përbashkët mes dy qeverive, i cili do të pasohet me nënshkrimin e 16 marrëveshjeve me fokus në fushën e lëvizjes së lirë, arsimit, drejtësisë, infrastrukturës, kulturës dhe lehtësimit të bashkëpunimit dhe shkëmbimit tregtar.
Gjatë këtij takimi do të nënshkruhet marrëveshja për njohjen reciproke të sigurimeve shoqërore, si dhe marrëveshja për lejet e qëndrimit në afat 5-vjeçar, ku përmes një aplikimi të thjeshtë qytetarët nga të dyja vendet do të marrin të drejtën e qëndrimit dhe njëkohësisht dhe lejen e punës në vendet respektive.
Agjenda e plotë:
09:45 – Mbërritja e delegacionit të Republikës së Kosovës
10:00 – Mbërritja e Z. Albin Kurti, Kryeministër i Republikës së Kosovës
10:10 – Hapja e sesionit plenar të mbledhjes së dy Qeverive Shqipëri-Kosovë
Fjalë e Z. Edi Rama, Kryeministër i Shqipërisë
Fjalë e Z. Albin Kurti, Kryeministër i Republikës së Kosovës
Fjalë të shkurtra nga anëtarë të dy kabineteve për të parashtruar çështjet kryesore dhe marrëveshjet për nënshkrim Z. Edi Rama, Kryeministër i Shqipërisë përmbyll sesionin plenar
11:20 – Ceremonia e nënshkrimit të marrëveshjeve ndërqeveritare
11:30 – Konferencë e përbashkët për shtyp e dy Kryeministrave
12:05 – Foto e përbashkët
12:10 – Drekë zyrtare shtruar nga Z. Edi Rama, Kryeministër i Shqipërisë, në nder të Z. Albin Kurti, Kryeministër i Republikës së Kosovës dhe delegacioneve të dy Qeverive
13:10 – Forumi i Biznesit Shqipëri – Kosovë
Bashkëbisedim i Kryeministrit të Shqipërisë, Z. Edi Rama dhe Kryeministrit të Kosovës, Z. Albin Kurti me përfaqësuesit e bizneseve.
/j.p/r.e/
