BRUKSEL – Biden: Do t’i tregoj Putinit “linjat e kuqe”

BRUKSEL, 14 qershor /ATSH-AFP/ – Presidenti amerikan, Joe Biden premtoi sot se do t’i tregonte presidentit rus, Vladimir Poutine se cilat janë “linjat e kuqe” gjatë takimit të tyre të mërkurën në Gjenevë.

“Ne nuk po kërkojmë një konflikt me Rusinë, por ne do të përgjigjemi nëse Rusia vazhdon aktivitetet e saj”, deklaroi ai në një konferencë shtypi në përfundim të samitit të NATO-s në Bruksel.

Joe Biden pranoi se presidenti rus, Vladimir Poutine është një njeri “inteligjent” dhe i “rëndë”.

“Por ai duhet të kuptojë se vdekja e opozitarit të burgosur Alexeï Navalny do të ishte një tragjedi”, theksoi ai.

Presidenti amerikan dënoi gjithashtu aktet agresive të Rusisë dhe këmbënguli në vullnetin e tij dhe atë të NATO-s për të mbështetur integritetin territorial dhe sovranitetin e Ukrainës.

Rusia ka aneksuar Krimenë në 2014 dhe mbështet separatistët prorusë në lindje të Ukrainës.

“Ne do të bëjmë gjithçka është e mundur që Ukraina të mund t’i rezistojë agresionit”, theksoi Joe Biden.

Por ai theksoi gjithashtu se anëtarësimi i Ukrainës në NATO, kërkuar me këmbëngulje nga presidenti, Volodymyr Zelensky, nuk varet nga ai, por nga një vendim i 30 anëtarëve të NATO-s./ /ec/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.