TIRANË, 12 mars/ATSH/ Kryetarja e Bashkimit të Dhomave të Tregtisë dhe Industrisë, Ines Muçostepa zhvilloi sot një takim me ambasadorin e Italisë në vendin tonë, Fabrizio Bucci.
Muçostepa bëri të ditur se në fokus të bisedimeve ishte zgjerimi i urave të komunikimit ekonomik mes dy vendeve.
“Jemi të bindur se ngritja e Komitetit të Përbashkët të Investimeve, me objektiv rritjen e shkëmbimeve tregtare dhe të investimeve, është një hap shumë i rëndësishëm dhe tregon edhe njëherë vullnetin e palëkundur që bashkëpunimi ekonomik të këtë rritje të mëtejshme”, tha Muçostepa.
Sipas Muçostepës, Italia është partneri i parë ekonomik, destinacioni i 50% të eksporteve të produkteve shqiptare dhe nga i cili importojmë 1/4 e vlerës së gjithë importeve.
“Trendi pozitiv u konfirmua edhe në muajin janar të 2021 me një rritje prej 4.5% të eksportit dhe rritje prej 13.1 të importit në krahasim me vitin 2020”, tha ajo.
Muçostepa mori së fundmi titullin e nderit “Kalorës i Urdhrit të Yllit të Italisë” nga Presidenti i Republikës Italiane.
/r.e/
