TIRANË, 12 tetor/ATSH/ Eksperti i Institutit të Shëndetit Publik, Alban Ylli, i ftuar në studion e ABC News ka deklaruar se mbajtja e maskës është një nga masat më efikase në parandalimin e virusit të rrezikshëm SARS-COV 2.
Ylli nënvizoi se qytetarët duhet të mbajnë maskat mbrojtëse në mënyrë që situata të mos kthehet në lockdown ose në izolim total.
Dr. Alban Ylli u shpreh se në fillimit e pandemisë mesazhet për maskën dhe mbajtjen e saj kanë qenë kontradiktore, por aktualisht shkencëtarë dhe epidemiologë në mbarë botën e klasifikojnë mbajtjen e maskave mbrojtëse si një nga masat e afirmuara për frenimin e përhapjes së infeksionit.
“Në fillimet e pandemisë mesazhet për maskat ishin paksa kontradiktore teksa theksi u vendos tek izolimi apo masat më të forta. Sot, në mbarë botën fokusi është tek vendosja e maskave mbrojtëse, si një nga mjetet kryesore që e kemi dhe që parandalon virusin dhe që na ndihmon të mos shkojmë në lockdown”, theksoi Ylli.
/gj.mima/j.p/r.e/
