OSLO, 23 mars /ATSH-AFP/ – Norvegjia njoftoi sot se synon të krijojë një fond brenda Organizatës së Kombeve të Bashkuara për të ndihmuar vendet e varfra që të përballen me pandeminë e koronavirusit.
“Ne jemi të shqetësuar për mënyrën se si virusi do të ndikojë në vendet në zhvillim, që kanë sisteme shëndetësore të brishta”, tha ministri Norvegjez i Ndihmës për Zhvillim, Dag-Inge Ulstein.
“Solidariteti ndërkombëtar është më i rëndësishëm se kurrë. Kjo është arsyeja se pse është e rëndësishme për ne të kontribuojmë ekonomikisht në një fond të tillë të OKB-së”, shtoi ai në një deklaratë.
”I financuar nga donatorë të ndryshëm, fondi duhet të krijohet, ndoshta këtë javë”, tha ministri.
Nisma, sipas Oslos, ka marrë edhe miratimin e zëvendëssekretares së përgjithshme të OKB-së, Amina Mohammed.
Të enjten, sekretari i përgjithshëm i OKB-së, Antonio Guterres paralajmëroi se miliona jetë do të ishin në rrezik nëse bota nuk do të tregohej solidare, veçanërisht me vendet më të varfra, përballë pandemisë së koronavirusit./ a.jor.
