PRISHTINË, 2 nëntor/ATSH/ Me iniciativë të Ministrisë së Drejtësisë është organizuar sot Kuvendi i themelimit të Odës së Ndërmjetësuesve të Kosovës.
Sekretari i Përgjithshëm i Ministrisë së Drejtësisë, Qemajl Marmullakaj, u shpreh në këtë Kuvend themelimi të Odës së Ndërmjetësuesve, se pozita e ndërmjetësuesit paraqet një rol shumë të rëndësishëm në sistemin e drejtësisë dhe qasjes më të lehtë të qytetarëve ndaj drejtësisë.
Ai bëri të ditur se ndërmjetësimi ka mundësuar zgjedhjen e më shumë se 6 mijë rasteve deri në fund të vitit 2018 të referuara nga Gjykatat dhe Prokuroritë Themelore.
Ndërsa drejtori i programit të USAID-it – Drejtësia Komerciale, Chris Thompson tha se qëllim i programit është përmirësimi i perceptimit të bizneseve dhe qytetarëve ndaj korrupsionit.
Ai ka thënë se do të vazhdojnë të mbështesin dhe të ndihmojnë ndërmjetësimin, duke theksuar se do të mbështesin Ministrinë e Drejtësisë në zhvillimin e udhëzimeve administrative.
Mision tjetër i Odës, tha ai, duhet të jetë që të ofrojë qasje në drejtësi për të gjithë qytetarët e Kosovës.
Kuvendi i themelimit të Odës së Ndërmjetësuesve pritet të zgjedhë anëtarët e bordit dhe kryetarin e saj./KosovaPress/
