TIRANË, 18 dhjetor /ATSH/ – Gazetarët të cilët hasin problematika gjatë punës së tyre tashmë kanë akses në ndihmë ligjore falas.
Komiteti Shqiptar i Helsinkit, me mbështetjen e Ambasadës britanike në Tiranë organizoi në Shkodër një workshop me gazetarët ku u diskutua për problemet që hasin ata në punën e përditshme.
KShH vëzhgon nga afër situatën e respektimit të drejtave të punës të gazetarëve, duke konstatuar se çdo ditë gazetarët përballen me mosrespektimin e të drejtave të tyre në vendin e punës, mungesës së një kontrate apo vonesa të pagesave.
KShH diskutoi me punonjës të sektorit të medieve të Shkodrës, Malësisë së Madhe e Lezhës, jo vetëm rreth problemeve që ata ndeshin lidhur me respektimin e të drejtave të tyre të punës, por dhe me aksesin në ndihmë ligjore falas.
Kjo asistencë mundësohet nga Komiteti Shqiptar i Helsinkit me mbështetjen e Ambasadës britanike në Tiranë, në kuadër të projektit “Mbështetje për një media të pavarur në Shqipëri”.
/gj.mima/j.p/
