BRUKSEL – Spanja mund të shndërrohet në pikë kalimin e ri të migrantëve

BRUKSEL, 8 korrik /ATSH-AFP/ – Spanja gradualisht mund të shndërrohet pikë kalimi i ri i zgjedhur nga migrantët që vijnë nga Afrika, pasi rrugët e tjera janë duke u mbyllur, paralajmëroi sot një zyrtar i BE-së.

Kreu i Agjencisë Europiane të rojeve kufitare dhe rojeve bregdetare (Frontex), Fabrica Leggeri theksoi se rreth 6 000 migrantë kanë zbarkuar në brigjet spanjolle vetëm në muajin qershor të këtij viti, thuajse sa shifra e gjashtë muajve të parë të vitit të kaluar.

I intervistuar nga gazeta gjermane ‘’ Welt am Sonntag‘‘ ai pohoi se nëse do të më pyesni se cili është aktualisht shqetësimi im më i madh do të thosha Spanja.

Ndërsa rruga nga Libia është bërë gjithnjë e më e vështirë nga shtimi i patrullimeve të rojeve bregdetare libiane, gjithnjë e më shumë migrantë po joshen nga kalimi drejt Spanjës duke u nisur nga Maroku.

Nëse shifrat do të vijojnë të rriten si aktualisht, ky rrugëkalim do të bëhet gjithnjë e më i rëndësishëm.

Greqia dhe Italia mbeten gjithsesi për momentin pikat kryesore të mbërritjes së migrantëve, por me një rënie të ndjeshme dy vitet e fundit.

Greqia e cila priti rreth 900 000 migrantë në vitin 2015, vitin e kaluar regjistroi 42 000 migrantë, pas marrëveshjes së vitit 2016 me Turqinë, sipas të dhënave të Frontex.

Italia vitin e kaluar priti rreth 120 000 migrantë, por që prej marrëveshjes së mesit të korrikut 2017 me rojet bregdetare libiane, prurjet e migrantëve pësuan një rënie me 75%, gjithnjë sipas Frontex./

/v.b/

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.