TOKIO, 13 mars /ATSH-DPA/ – Kryeministri japonez, Shinzo Abe deklaroi se Koreja e Veriut duhej të merrte veprime konkrete drejt rrugës së denuklearizimit në Gadishullin Korean, gjatë bisedimeve me shefin e shërbimeve sektrete të Koresë së Jugut, Suh Hoon.
“Është shumë e rëndësishme për Korenë e Veriut që të zbatojë fjalët e saj në praktikë, duke ndërmarrë veprime konkrete drejt denuklearizimit”, deklaroi Abe.
Këtë muaj, Pheniani premtoi se do të pezullonte testet e raketave bërthamore dhe balistike, pas bisedimeve me një delegacion të Koresë së Jugut, ku Suh u takua me liderin e Koresë së Veriut, Kim Jong Un.
Gjithashtu, Shtëpia e Bardhë njoftoi se takimi midis presidentit amerikan, Donald Trump dhe liderit koreano-verior, Kim nuk do të zhvillohej nëse Korea e Veriut nuk do të vinte në zbatim premtimet e saj.
“Unë jam këtu për të përcjellë mesazhin e presidentit Moon Jae se bashkëpunimi midis Japonisë dhe Koresë së Jugut është i domosdoshëm për të kthyer rrjedhën e paqes, e nxitur nga Lojërat Olimpike të Pyeongchang”, tha Suh.
Gjithashtu, Moon dhe Kim kanë rënë dakord për të zhvilluar një takim të nivelit të lartë në fund të muajit prill./ /a.i/ a.jor.
