NJU-DELHI, 8 tetor /ATSH-AFP/ – India do të rihapet për turistët e huaj nga 15 tetori, pas një mbylljeje prej më shumë se një viti për shkak të pandemisë COVID-19, njoftoi qeveria.
“Pas marrjes parasysh të informacioneve të ndryshme, India ka vendosur të fillojë dhënien e vizave të reja turistike për të huajt që udhëtojnë në Indi, nga 15 tetori 2021″, tha Ministria e Brendshme në një njoftim për shtyp.
“Turistët e huaj, transportuesit që ia sjellin ata në Indi, si edhe të gjithë aktorët në aeroporte, duhet të ndjekin të gjitha protokollet COVID-19”, shtoi ajo.
India pezulloi të gjitha vizat për të huajt në mars 2020, kur COVID-19 filloi të përhapet në të gjithë botën, pasi qeveria vendosi një bllokim të rreptë në vend.
Midis marsit dhe majit, India u godit nga një valë e ashpër epidemike, me kulme prej rreth 400 000 infektime dhe 4 000 vdekje në ditë të regjistruara në pikun e krizës./ /ervo/
