TIRANË, 14 shtator /ATSH – I. Vata/ Komisioni për Çështjet Ligjore, Administratën Publike dhe të Drejtat e Njeriut shqyrtoi sot projektvendimin për ngritjen e grupit të punës, për disa shtesa dhe ndryshime në ligjin për Kodin Zgjedhor pas hyrjes në fuqi të ligjit për disa ndryshime kushtetuese.
Kryetari i Komisioni të Ligjeve Ulsi Manja tha se “meqënëse ndryshimet kushtetuese tashmë kanë hyrë në fuqi, ky grup pune propozoi tre kolegë, dy nga shumica dhe një nga opozita, të asistuar nga ekspertët e Reformës Zgjedhore, brenda datës 30 shtator 2020 nën konsulencën e eksperteve të reformës zgjedhore të draftojnë dhe të paraqesin në Kuvendin e Shqipërisë ndryshimet përkatëse në Kodin Zgjedhor si reflektimi i ndryshimeve kushtetuese që kanë hyrë në fuqi”.
“Grupi u punës përbëhet nga 3 deputetë. Unë propozoj që nga mazhoranca në këtë grup punë të jenë kolegët Damian Gjiknuri dhe Klotilda Bushka, ndërsa nga opozita në komisionin e ligjeve është propozuar deputeti Korab Lita”, tha ai.
Pasi hidhet në votim, me shumicë votash miratohet dhe ngritja e grupit të punës për hartimin e ndryshimeve në Kodin Zgjedhor. /j.p/r.e/
