TIRANË, 13 janar /ATSH/ Kryetari i Partisë Demokratike, Sali Berisha ka zhvilluar një takim me kryesinë e partisë, ku në fokus të diskutimeve ka qenë diaspora dhe procesi i votimit nga ana e saj.
Duke folur në mbledhjen e kryesisë së PD, për votën e diasporës, Berisha u shpreh se, “ky është një eveniment i jashtëzakonshëm, i një rëndësie shumë të madhe në historinë elektorale”.
Teksa foli për mazhorancën, Berisha u shpreh se “ata nuk kanë program, por vetëm mashtrime”.
“Nuk u ofrojnë asgjë qytetarëve, përveç cinizmit të tyre, përveç përçmimit”, tha Berisha.
Berisha tha më tej se do të ulin në 70 lekë çmimin e energjisë.
“Modeli ynë: Enti Rregullator i Energjisë do të vendosë, do të rikthejë jo 77, por 70 lekë 300 kilovatët e parë. 100 lekë, jo 115 fashën e dytë. Kurse bizneset do të zbresin përsëri në 60 lekë”, tha Berisha.
Në fund të fjalës së tij, kryetari i Partisë Demokratike Sali Berisha u ka bërë thirrje diasporës dhe emigrantëve kudo që janë, të regjistrohen në portalin e KQZ-së, për të pasur mundësinë që të votojnë.
“Është e vërtetë që ka vështirësi, pse e tek, auditi ynë, një grup i yni po bën auditin e platformës dhe me shpejtësi do të na informojë se ku qëndrojnë problemet. Por përsëri, thirrja ime është: Mos e humbni durimin! Aplikoni dy, tri herë, deri sa të regjistroheni”, tha Berisha.
Berisha shtoi se “përveç kësaj, PD ka hapur portalin e saj në të cilën cilido që kërkon të mësojë më shumë, për procedurën e regjistrimit, regjistron emrin aty dhe në mënyrë automatike merr të dhëna të sakta, të plota, se çfarë procedure duhet të ndjekë, për t’u regjistruar në KQZ”.
“Është jashtëzakonisht e rëndësishme. I garantoj se të dhënat e tyre, kanë garanci absolute në këtë faqe dhe se kjo shkurton rrugën me instruktazhin që merr për regjistrimin në KQZ.
Platforma e KQZ-së mund të ketë defektet e veta, ato do të përmirësohen. Auditi teknik së shpejti do të dalë me konkluzione për të gjetur ku janë problematikat dhe për t’i korrigjuar sa më shpejt”, tha Berisha.
/r.e//a.f/
