TIRANË, 10 janar /ATSH/ Partia Republikane festoi sot 34-vjetorin e themelimit dhe kryetari i kësaj force politike, Fatmir Mediu mesazhin e tij në rrjetet sociale e nis me vlerësimin e themeluesit të kësaj force politike, Sabri Godo.
“Kujtojmë me respekt të gjithë ata që krijuan Partinë Republikane përfaqësuan atë në Qeveri, parlament, bashki dhe komuna. Njerëz të mirë të ndershëm e patriotë, antikomunistë dhe shqiptarë të ndershëm që luftuan për një Shqipëri Europiane dhe një Shqipëri në NATO”, tha Mediu.
“Partia Republikane është partia që në programin e saj ka besimin në Zot si baza e besimit tek vetja, tek liritë dhe të drejtat e individit, si baza e një shoqërie të lirë dhe demokratike. Partia Republikane ka luftuar kundër grabitjes së pronës private pronarëve të ligjshëm me ligjin famëkeq 7501 e ligje të tjera leniniste që kanë krijuar padrejtësinë më të madhe të demokracisë dhe një kalvar vuajtjesh pa fund të shqiptarëve dhe ndikuar në largimin masiv të tyre nga Shqipëria”, u shpreh Mediu.
“Partia Republikane beson se familja është baza e shoqërisë sonë. Partia Republikane është partia e cila beson tek prona private si baza e ndërtimit të ekonomisë dhe lumturisë e mirëqenies familjare”, theksoi Mediu. /j.p/
