TIRANË, 23 korrik/ATSH/- Policia e Shkodrës njofton se ka asgjësuar 10 000 bimë kanabis sativa.
Në një komunikim për mediat, Drejtoria e Policisë së Shkodrës ka dhënë detaje nga vijimi i operacionit “Territor i pastër”, kundër kultivimit të bimëve narkotike
“Nga mëngjesi i sotëm, deri tani, janë asgjësuar mbi 10 000 bimë kanabisi. Në funksion të këtij plani operacional, që nga janari i vitit 2024 deri sot që po flasim, janë asgjësuar 224 500 bimë dhe fidanë cannabis sativa, janë evidentuar 241 raste të kultivimit, për të cilat janë referuar materialet për fillimin e procedimit penal në Prokurorinë e Rrethit Gjyqësor Shkodër”, njofton Policia e Shkodrës.
“Fokusi i punës së strukturave të Policisë Shkodër nuk është përqendruar vetëm tek asgjësimi i bimëve narkotike, por edhe te goditja e veprimtarisë kriminale që ka të bëjë me shpërndarjen e lëndëve narkotike dhe me trafikun e këtyre lëndëve”, përfundon njoftimi.
