TIRANË, 10 nëntor/ATSH/ Kryeministri Edi Rama bëri të ditur sot lajmin e mirë se në buxhetin e vitit 2024 është parashikuar rritje e pagave për mësuesit.
Në një postim në rrjetet sociale, Rama thekson se me buxhetin e ri për vitin e ardhshëm do të ketë një rritje domethënëse të pagave për mbi 30 mijë mësues.
Projektbuxheti i vitit 2024 për Ministrinë e Arsimit dhe Sportit parashikohet në vlerën 52 miliardë e 223 milionë lekë, me një shtesë fondi prej 5 miliardë e 49 milionë lekë ndaj buxhetit fillestar të vitit 2023, ose një rritje prej 10.7%.
Fondi i rritjes së pagave për mësuesit për vitin 2024 parashikohet në shumën 4 miliardë lekë, duke projektuar buxhetin e MAS në shumën 56 miliardë e 223 milionë lekë, ose 9 miliardë e 49 milionë lekë më shumë se buxheti fillestar i vitit 2023.
Gjithashtu, do të vijojë mbështetja e dedikuar për 1700 mësuesit ndihmës në mbështetje të fëmijëve me aftësi të veçanta, për 850 punonjësit psiko-socialë dhe 220 oficerë sigurie në shkolla.
/r.e/
