LONDËR, 18 prill /ATSH-DPA/ – Sekretari i Jashtëm britanik, David Lammy deklaroi se Rusia duhet të pajtohet me një armëpushim të menjëhershëm, të plotë dhe të pakushtëzuar, pas takimit me homologët e SHBA-së dhe Evropës për bisedimet për përfundimin e luftës në Ukrainë.
Sekretari i Jashtëm udhëtoi në Paris për diskutimet e para të nivelit të lartë midis zyrtarëve britanikë, francezë dhe të Shtëpisë së Bardhë që kur kryeministri i Mbretërisë së Bashkuar, Keir Starmer dhe presidenti francez Emmanuel Macron vizituan veçmas Uashingtonin në shkurt.
Lammy ndau pak detaje rreth serisë së takimeve që u zhvilluan në kryeqytetin francez, por tha se bisedimet “theksojnë angazhimin tonë të përbashkët për sigurinë globale”.
Delegacione nga Gjermania dhe Ukraina ishin gjithashtu në Paris, si dhe sekretari i Shtetit i SHBA-së Marco Rubio dhe i dërguari special i SHBA-së Steve Witkoff.
Lammy tha se “në një botë të paqëndrueshme, uniteti është forca jonë. Takimet me Francën, SHBA-në, Ukrainën dhe Gjermaninë nënvizojnë angazhimin tonë të përbashkët për sigurinë globale. Ne duhet të shohim një paqe të drejtë dhe të qëndrueshme në Ukrainë dhe stabilitet në Lindjen e Mesme”.
Bisedimet për një paqe të mundshme kanë dështuar që kur Moska refuzoi një propozim armëpushimi që ishte rënë dakord nga SHBA dhe Ukraina muajin e kaluar.
Ndërkohë, Mbretëria e Bashkuar dhe Franca kanë kërkuar të mbledhin një koalicion kombesh që do të ishin të gatshëm të mbronin një armëpushim nëse arrihet një i tillë./ /os/
