TIRANË, 11 shkurt/ATSH/ Kryeministri Edi Rama tha sot se marrja nën hetim, në kuadër të dosjes përmes së cilës u arrestua edhe kryebashkiaku Erion Veliaj, i kryetares së Komisionit të Ligjeve në Kuvend, deputetes së Partisë Socialiste, Klotilda Bushka, pa u pyetur asnjëherë nga prokurori i posaçëm, nuk është një shenjë e mirë për drejtësinë.
I pranishëm në ceremoninë e 105-vjetorit të shpalljes së Tiranës Kryeqytet i Shqipërisë, Rama tha se Bushka ka dëgjuar nga televizionet dhe gazetarët se është nën hetim.
“Kryetarja e Komisionit të Ligjeve ka kërkuar të dëgjohet nga grupi parlamentar. Pse? Sepse e ka dëgjuar nga TV, jo nga prokurorët, por nga TV dhe gazetarë specialë që disponojnë dokumente që nuk i kanë as të akuzuarit se është person i dyshuar. Kryetarja e Komisionit të Ligjeve?!”, tha Rama.
“Jo se mund të mos jetë e dyshuar, por të jetë person i dyshuar dhe ta marrë vesh nga TV se emri i figuron në aktakuzë, e të mos jetë pyetur asnjëherë?! Ej… Çfarë është kjo? Të mos i jetë dhënë asnjëherë e drejta e fjalës?!”, vijoi ai.
“Këto nuk janë shenja aspak të mira. Unë dua të shpresoj që nuk janë shenja që lidhen me simptomat e një sëmundjeje të vetëbesimit. E dua të besoj tek ajo që kam thënë dhe i qëndroj asaj: kjo nuk është republikë prokurorësh që është në materializimin e saj përfundimtar, sepse do të ishte autogoli më i madh që, në vullnet të mirë dhe me sy mbyllur, do të bënim duke transformuar drejtësinë”, u shpreh Rama ndër të tjera.
(vijon…)
/a.f/r.e/
